Temario do CELGA 3: contidos, competencias e que necesitas dominar no exame

O Celga 3 acredita un nivel intermedio de competencia en lingua galega. É o nivel no que xa se espera que a persoa poida intervir nun conxunto variado de situacións, incluíndo contextos menos previsibles, e que sexa capaz de argumentar, distinguir información principal e secundaria e producir textos cun grao alto de corrección normativa.

Neste artigo tes o temario do Celga 3 ordenado por habilidades e por contidos lingüísticos, para saber exactamente que entra e que debes preparar.

Que nivel de galego acredita o CELGA 3

Quen supera o CELGA 3:

• Desenvolvese con soltura en situacións comunicativas variadas, tamén con certa complexidade.
• Comprende textos orais e escritos máis elaborados e sabe distinguir o esencial do accesorio.
• Escribe e fala con bastante corrección, con estruturas máis flexibles e léxico máis amplo.
• Pode defender un punto de vista sobre cuestións xerais, indicando vantaxes e inconvenientes.
• Está en condicións de traballar e interactuar en ámbitos onde o galego é lingua habitual (por exemplo, en cursos académicos ou intercambios universitarios en Galicia).

Comprensión oral no CELGA 3

No Celga 3 esíxese comprender discursos lingüisticamente máis complexos, con temas concretos e abstractos, e identificar liñas argumentais cando o tema é razoablemente coñecido.

Debes ser capaz de comprender, entre outros:

• Conversas xerais sobre temas variados e pouco previsibles.
• Avisos e informacións en espazos públicos.
• Noticias de televisión (co apoio da imaxe) e programas de radio sobre temas xerais ou coñecidos.
• Explicacións dun guía nunha visita turística ou de traballo.
• Conversas, explicacións e debates da túa área profesional.
• Conversas nas que predomina a argumentación (aínda con algunha limitación).

Comprensión escrita no CELGA 3

A lectura neste nivel é máis autónoma. Espérase un vocabulario amplo e bo dominio das estruturas sintácticas básicas, aínda que poden existir dificultades en períodos moi complexos.

Debes comprender con solvencia textos como:

• Cartas e anotacións persoais con modismos frecuentes.
• Textos xornalísticos informativos e de opinión (xerais ou do teu interese).
• Formularios administrativos diversos.
• Cartas e escritos da túa área profesional.
• Relatorios de áreas coñecidas e o sentido xeral de artigos pouco coñecidos.
• Textos literarios.

Expresión oral no CELGA 3

Na expresión oral espérase un discurso máis sólido: descricións, narracións e exposicións con detalles relevantes, bo control gramatical e uso de oracións de certa complexidade.

Valórase que:

• Manteñas un ritmo de fala bastante uniforme.
• Non cometas erros que provoquen incomprensión.
• Sexas capaz de autocorrixirte.
• Xestiones a quenda de palabra e participes en debates (confirmando comprensión, invitando a participar, etc.).
• Uses mecanismos de cohesión para un discurso coherente.

Situacións típicas que debes saber resolver:

• Reembolsos, trocos, reclamacións e valoración do servizo en hostalaría e comercio.
• Explicar síntomas, pedir información sanitaria e posibilidades de tratamento.
• Argumentar opinións en conversas e debates sobre actualidade ou vida cotiá (con algunha dificultade aceptable).
• Pedir aclaracións nunha visita guiada e orientar visitas.
• Pedir e dar información sobre temas coñecidos.
• Reproducir mensaxes e opinións doutras persoas.
• Facer preguntas nunha conferencia/aula sobre temas previsibles.
• Realizar unha presentación breve sobre un tema coñecido.

Expresión escrita no CELGA 3

Na escrita pídese producir textos claros e estruturados, cun notable dominio ortográfico, morfosintáctico e léxico común, e con cohesión eficaz.

Debes poder:

• Escribir cartas e correos relatando feitos, experiencias e valoracións.
• Redactar informes breves sobre actualidade ou actividade profesional (aínda que poidan requirir revisión).
• Describir con precisión persoas, obxectos, servizos ou situacións.
• Expoñer opinións sinxelas sobre textos lidos/oídos ou vivencias.
• Sintetizar ou reformular información de medios e vida cotiá.

Gramática do CELGA 3

Inclúe todo o dos niveis anteriores e amplía e sistematiza o funcionamento do código. Entre os puntos clave:

• Casos especiais de xénero e número.
• Substantivos e adxectivos: xéneros diferentes, plurais fixos, substantivación, graos.
• Formación de palabras: derivación e composición.
• Cambios de significado pola posición do adxectivo (home bo / bo home).
• Secuencias de determinantes (este meu amigo, algunha outra solución).
• Usos especiais de posesivos: artigo si/non, de meu/de teu, cadanseu.
• Numerais e indefinidos: aproximativos, partitivos, cantidades aproximadas.
• Sistema pronominal: valores, usos e posición; nós/nosoutros, vós/vosoutros.
• Colocación de pronomes átonos en perífrases e complexos verbais (téñoo que facer; seino facer/sei facelo).
• Usos de se: reflexivo, pronominal, impersonal, pasivo.
• Tempos de indicativo e subxuntivo (incluído pretérito) en verbos regulares e irregulares.
• Perífrases de infinitivo, xerundio e participio; participios irregulares.
• Infinitivo conxugado.
• Preposicións e locucións prepositivas; adverbios e locucións adverbiais.
• Marcadores do discurso: inicio, exemplificación, explicación, reformulación, conclusión.
• Oracións complexas, conxuncións coordinantes e subordinantes.

Fonética e ortografía

No CELGA 3 tamén se avalía un maior refinamento:

• Pronuncia de ditongos e hiatos.
• Realizacións consonánticas (nasais, oclusivas/aproximantes, etc.).
• Coñecemento das principais variedades fonéticas do galego.
• Encontros vocálicos e silabación (pronuncia e representación).
• Entoación segundo o tipo de enunciado.
• Uso correcto de maiúsculas e minúsculas.

Léxico do CELGA 3

Abarca ámbitos máis amplos e específicos que en CELGA 2, como:

• Vestimenta, hostalaría, comercio e comidas/bebidas.
• Léxico académico e administrativo.
• Medicina e farmacia.
• Lecer e tempo libre.
• Medio natural e traballo.
• Mundo da cultura, espectáculos e festas.
• Informática.
• Fórmulas de correspondencia (rexistros e formalidade).

Contidos socioculturais

Aquí aumenta a profundidade e a reflexión, co obxectivo de poder argumentar sobre a realidade galega con criterio:

• Economía: sectores produtivos, mundo empresarial.
• Organización política e administrativa: institucións, partidos.
• Situación política e social recente e actual.
• Situación cultural recente e actual.
• Situación lingüística recente e actual en Galicia.